Latest

හෘදයක් නැති දේශයක සාක්ෂිය …

11800396_810824019032725_1720422854859529994_n

 

 

 

 

 

 

 

රේඛීය චලිතයක
ඒකීය උණ්ඩ හිස
වැදී පිපිරුණු පසුව
සිවිල් දන හිස් මතට
ශෝකීය දසුනක්ද ?
කොහෙත් නැත – කොහෙත් නැත

තුවක්කුව ඕකේ
‘තුප්පාකි’ ගත්තොත් සෝකේ
දෑත් බැඳ ළිඳට දා
හිසට ගල් හෙළන විට
වතුර බොර වෙන – නොවෙන
තියරි එහෙමයි සහෝ මේකේ

කන්නට අඳින්නට
කෑම්ප් එක ළඟ පාරෙ යන්නට
‘සිංදුව’ කියන්නට
හැර යමක් ඕනෑද උන් හට

හෙළ සිත නොරිදවා
පෙර තනුව නොවරදවා
‘පර’ කම අවුළුවා
සොයුරු දම් පෙන්නයි කුමරුවා

‘විඩුතලෙයි’ කියන්නේ
මොන හරුප මඟුලක්ද ?
විමුක්තිය ! ඔව් සහෝ,
ඒකෙ නම විමුක්තිය !!

සුවහසක් හෘදයන්
තළා මිරිකූ දිනෙක
ඒ ලෙයින් කිරිබත් ද
පිස වැළඳු දීපයක
දෙවියනුත් සාක්කිය !
මේ තමයි දේශයේ
අමු හෘද සාක්ෂිය !!

නෑ යකුන් එළවුමට
ආටානාටි වෙනුවට
‘ආටිය’ ම සොයා ගිය
ඒකීය දේශයක,

ආනන්ද, ඇසෙන්නෙද වදන් වෙඩි සද්දේ
ඉවරයැයි කීවාට ඉවර නැති යුද්දේ
අඩිය අඟලට තැළූ දැයක ඇස් මත්තේ
සර්පයා පිඹින්නෙලු සාක්කිය හර්දේ !!

~ රුවන් නෙලූ

ඔබ නික්ම ගොස් තිබුණා

1918187_918702614911531_5434825988726880550_n
ඔබ නික්ම ගොස් තිබුණා
එක්තරා සවසක
නොකියාම
ඔබ නික්ම ගොස් තිබුණා
 
කඳුළු සීතල වැස්ස උතුරන
හදක් පතුළේ අකුණු පුපුරන
සුසුම් සුළඟින් කවුළු දෙදරණ
එක්තරා සවසක
ඔබ නික්ම ගොස් තිබුණා
නොකියාම
 
සඳක් අබිනික්මන් කරන්නට
ගණන් බලමින් හිඳින මොහොතක
වළාකුළු පෙළ මක් කරන්නද
තරු දෑස් මතකයෙ ඇමිණී
රිදුම් දෙන වර නේක
එක්තරා සවසක
ඔබ නික්ම ගොස් තිබුණා
නොකියාම
 
~ රුවන් නෙලූ

තෙල් සායම් කිරිල්ලියෝ

12540894_895420810573045_6822085373763628969_n

ළා රෝස පාට අහසේ
තෙල් සායම් කිරිල්ලියෝ
යා යුතුද කොහිද නොදනී
මල් මායම් මැවිල්ලියෝ

වී කුරුළු රෑන් අස්සේ
බටු ගිරා රෑන් ගැවසේ
මල් මාල බැඳන් රන් රිදී පොටින්
දිළිසි දිළිසි ඒවී
තෙල් සායම් කිරිල්ලියෝ

ගී ශෝක රාව මැද්දේ
තනි දෙමළිච්චන් පැද්දේ
නැති අත පුච්චන් මැද බළල් ගැටව්
නැටුම් නටා පාවේ
තෙල් සායම් කිරිල්ලියෝ …..

~ රුවන් නෙලූ

හීනයක අවදියෙන් ….

badulu-train
කවි මල් ඇහැරවන
 
විල්ලූද තණ පිඩැලි රැඳවුණ
 
උසම උස කඳු සිරස් අද්දර
 
අනන්තය බඳු කාලයක් පසු
 
හුස්ම ගමි මම
 
 
කහ පාට මල්
 
සිනාසෙයි මට
 
මිහිදුම් තිරය අතුරින්
 
අතවනයි ගස්
 
ඈත සිට මට
 
 
මෑත ලේ වැගිරෙයි
 
හිමිකමක් ඉල්ලූ සොයුරු හද
 
හදට වැදි අකුණක්
 
නොසලකා හැරියාවත්ද මම ?
 
 
සොබාදම් සිරි විඳිනු කෝමද
 
හැරෙමි ආපසු
 
හිමි අහිමි අපෙ
 
ජීවිතය වෙත
 
 
මේ මම ය,
 
ඒ අහිමි කළ නුඹය
 
 
දිනා ගත යුතු
 
බොහෝ දේ මැද
 
ඒ අහිමි කළ නුඹය ….
 
 
නිමේෂයකට
 
චුට්ටකින් අඩු
 
කාලයක් තුළ
 
සිනාසෙමි මම
 
 
පැද්දෙන රේල්ලුව
 
කියාදෙයි ජීවිතේ ඇති තතු
 
ගැස්සි ගැස්සී ඇද්දෙන
 
 
ළඟ යැයි කියා
 
සිතෙනා හැම දේම
 
කොයි තරම් නම් දුරද ?
 
හැකියැයි කියා සිතුවාට
 
බැරි දේ ද
 
කළත් ඵල නැති දේ ද
 
පීල්ලක් කොඳුරා කියයි මට
 
 
තැලෙනා අතරතුර
 
හැමදාම
 
ළං වෙනු බැරි වුව ද
 
අනන්තය දුර ඈත තැනකදි
 
එකතු වෙන එක හීනයක් වුව
 
කොයිතරම් නම් අනේ සොඳුරුද ?
 
 
පිණි කැටක් වියැකෙන්න කලියෙන්
 
ලියන්නට තව බොහෝ දේ ඇත
 
 
රුධිරයක් මල් පැන් පොදක් වී
 
සමනළුන් මකරයින් වූ කළ
 
ලෝකයක් තිබෙන්නේ
 
හතරවැනි මානෙකද ?
 
 
සොඳුර,
 
 
ඇස් පියන් යට වුව ද
 
නොපෙනෙනා තව බොහෝ දේ ඇත
 
තමන්ගේ රුධිරයෙහි ගිළුණ ද
 
නොදැනෙනා දේ ඔව්, අපට ඇත
 
 
හුරු කෙරුණු තරමය,
 
කුමක් හෝ වැරදුණු නියාවක්
 
නොදැනෙනා තුරු
 
මිනිස්කම් දිය වී හැළෙන යුරු
 
නොදැක්කා සේ නොහැඟුණා සේ
 
ඉන්න නුඹ මා
 
හුරු කෙරුණු ඒ තරමය ..
 
 
බිඳිය යුතු වෙයි
 
සීහගිරි ශිඛරය
 
කුවේර ආලකමන්දාව
 
සියල්ලන් වැඳ වැටෙන
 
සියළු ලේ වැකි සිහිවටන හෙට
 
 
නූඹේ හිස හයියද ?
 
 
 
~ රුවන් නෙලූ

පෙති හැළුණු ජීවිතය !!

11350556_778704158911378_8970290964587402387_n

මගේ ම වු ලෝකයක
මා තුටින් සිටිය දී
‘ඔවුහු’ මට ‘පිස්සා’ ය කීහ.

එයින් පසු මෙහෙයුම ඇරඹිනි.

බෙහෙත් පෙති ටොන් ගණන් හෙළා
සිහින කඳුවැටි සමතළා කෙරිණි
එන්නත් කටු වලින් ඇණ
සුරඟනන් සමනළුන් ඝාතනය කෙරිණි
සේලයින් දියෙන් තනුක කොට
නහර ගත අමෘතය බෙලහීන කෙරිණි
ක්ෂීරපථයෙන් එපිට සැරිසැරූ ආත්මය
විදුලි සැරයකින් ඇද කූඩු කරනා ලදී

දැන් මා ‘ඔවුන්’ ගේ ලෝකයේ ය.
ජීවිතය කියන්නේ මේක ලු ය.

දෙන දෙයක් කෑ යුතුය, කියන දේ කළ යුතුය
වැඩිත් නොසිතුව යුතුය, යන අතට යා යුතුය

සමනළුන් හා එක්ව සෙනසුරුට පියඹන්න
ප්‍රොමිතියස් හා එක්ව සොරාගත් ගින්දරෙන්
දුම්වැටිය අවුළන්න
නොහැක මට සුරඟනන් හා එක්ව
රාගනිශ්‍රිත ගීත මුදු හඬින් මුමුණන්න
සින්ඩරෙල්ලා සොයා සපත්තුව පළඳන්න
ස්පාටකස් හා එක්ව සටන් වැද ජය ගන්න
කල්වාරි මුදුණතෙහි ජීසස්ට සම වෙන්න
දිනපතා මියැදෙන්න උත්ථානගත වෙන්න
සන්තානයට උරුම නිදහසේ කිමිදෙන්න,
නොහැක මට …

ජීවිතය කියන්නේ මේක ලු ය.
දැන් මා ද ඔවුන්ගෙන් එකෙක් ලු ය…. !!

~ රුවන් නෙලූ

30/05/2015

ඕං බෝසත් කම !

pc541

පැතුම බුදු බව උනත්
දරුවන් ව දන් දෙද්දි
ඒක බිස්නස් එකක්

ඉතිහාසයට උත්තර
දියන් වෙස්සන්තර

දරු දෙදෙන කියන්නේ
උඹට තව දේපළක්
හැඟීමක් දැනීමක්
උඹට නැති මස් ගොඩක්

දරුවන්ට වහල් කම
උඹට මතු බුදු කම
දස පාරමිතා මැද
මියගිහින් මිනිස්කම

~ රුවන් නෙලූ

02/08/2014

සිංහයා ….

The-LION-Brewery-Ceylon-PLC-

කොළඹ වීදිය කොණක
යකඩ පාළම මෙපිට
බීර හල් දොරක සිට
දිනක් මට සිංහයෙක් ඉඟි කළා

බීර වීදුරු හතක්
තැම්බු කඩලත් සමඟ
හිස් කළායින් පසුව
සිංහයා හෙමින් දොඩමළු වුණා

කන්තෝරු වහල යට
ලොක්කන්ගෙ දෙපා මුල
නූහුලන අපහාස
විඳින්නෙ ලු සිංහයා
ලයිට් බිල් වතුර බිල්
ගෙවල් කුළි හාල් පොල්
පඩි පතෙන් විසඳන්න
බැරුවාලු සිංහයා

සුප්පාට අකැමැති ලු අම්මා
ගෙදරම ලු නංගිලා දෙන්නා
හොරෙන් කැන්දාන ආ
ආදරේ පහු දොරින්
පැන ගිහින් යැයි කියයි සිංහයා

සිංහ බා නූපන් ශෝකයෙන්
සුප්පාව කෙරෙහි ම කෝපයෙන්
හතර ගාතෙන් ගෙදර ගොඩවී
තළනව ලු සුප්පාට සිංහයා

පරපුරක අවසාන පුරුක ලු
විසඳුමක් පේන මානෙක නෑ ලු
හිර කරපු හිතක් මී විතක් ළඟ දිග ඇරන්
සුසුම් ලා හිනා වුණි සිංහයා

~ රුවන් නෙලූ

28/08/2014

ඉතිහාසය යනු ?

11880157_818898581558602_1408605596_n
ඉතිහාසයක් කියන්නේ
තෝරාගැනීමකටය
තේරීම දඩයක්කරුගේය

මම මුවා දුටුවෙමි
හඹාගියෙමි
විද හෙළූයැමි

මිසක,

දුනු හී දැරූවෙකු දුටිමි
පැනගියෙමි
ඇළපත දෙසින් වේදනාවක් දැණිනි

කියන්නට කෙනෙක්
ඉතිරි නොම වේ මය

විජිත පුර බලකොටුව බිඳ හෙළූ දා
කිතුලෙන් වැටී කොන්ද බිඳගත්
සේතුවා කවරෙක් හඳුනයිද

කඩොලැතු මතක මුත්
එළාරගෙ ඇතුගෙ නම
කී දෙනෙක් හට වැදගත්ද

ඉතිහාසයක් කියන්නේ
තෝරාගැනීමකටය
තේරීම දඩයක්කරුගේය

වීරයින් සාපේක්ෂය
කාලානුරූපව බිඳ වැටෙන සුළුය

ඉතිහාසගත වීරයින් ගැන
කවර නම් කතාද තව

මොහොතකින් සිරුර
සුණුවිසුනු කරගත්
හසලක ගාමිනී විරුවෙකි
උපවාස කර
දියබිඳක් හෝ නැතිව මියගිය
තිලීපන් ද්‍රෝහියෙකි

කැණිමක ගැඹුර
තීරණය කෙරෙනුයේ
කණින්නා මෙහෙයවන දැක්මය

ඉතිහාසයක් කියවන්න
එහි සත්‍ය නොසොයන්න
ලියූවන් ගේ නෙතින්
උන් දැක්ම කියවන්න

~ රුවන් නෙලූ

22/04/2015

සිද්ධාර්ථ ….. !

dsc08232

සුජාතා හිත හොඳ ගෑණි
ඒත් නුඹ,
ගිල දැමූ පසුව කිරි පිඬු
විසි කළා පාත්‍රය ගං දියට

සිද්ධාර්ථ !

පාත්‍රය උනත්
හැමදා ගලන පහළට ම මිස
නො ඇදිය යුතුය ඉහළට
උඩු ගං බලා පිහිනීම
බුදු කෙනෙක් නොව
අතුරුදන් නමක් පමණක්
ඉතිරි කරනවා ඇත

රාහුලත් වඩාගත් යසෝදරා
රස්තියාදු වනු ඇති
සෙබළ කඳවුරු අසබඩ
පෝස්ටර් අලවයි ඡන්න
‘වහා නිදහස් කරනු!’ නුඹ පිණිස
සුද්ධෝදනගෙ ඇස්
අන්ධ වෙයි මඟ බලා ඉඳලම
ගෝතමී පොල් ගහයි මිරිස් අඹරයි
කාලි මෑණිය පාමුල
වසරකට වරක්වත්
හිත මිතුරු කැළ එක්ව
දෙදරවයි කිඹුල්වත් වට රවුම

පස් මහ බැලුම්
රාහුල සෙල්ලමට ගනු ඇත
පය තැබු තැනෙක නෙළුම්
ඔහේ පරවී යනු ඇත
ලුම්බිණිය තවත් එක
උයනක් ව අමතකව යනු ඇත
සාරාසංඛ කල්ප ලක්ෂයක්
පිරු පෙරුම් අවසන
බඩ කපා සමුදුරට
බිලි කෙරෙනු ඇත

ආපසු හැරීම ද නොහැක

පස්වග මහණු
පාවා දුනැයි නුඹ අරගලය
හත් පොළේ සෙල් ලිපි ලියනු ඇත
ඡන්නයා මුහුණවත් නොබලාවි
රාහුල නුඹව නොහඳුනයි දැනටමත්
බිඳුණු හිත් කැඩපත
පුරුද්දයි යසෝ,
එනමුත්
පිළිබිඹුව පෙර මෙන් නොවනු ඇත

සිද්ධාර්ථ,

බෝසතෙක් වීම ලේසි නැත
සංසාර චක්‍රයෙන්
බුදුන්ටත් ගැළවුමක් නොමැති තැන
වංචාව දිනනු ඇත !

~ රුවන් නෙලූ

07/06/2014

යුද්දයෙන් මැරුණේ මිනිසුන් එකහමාරක් පමණකි – පුවඟු දිවයිනේ රහතුන්

1525771_502236369891493_1829922796_n
දුටුගැමුණු මචං
කෝමද ඉතිං වං හුං
ගේම දැක්කද අපි මෙහේ දුන්
සදා සොත්ථිය මීක් නෑ උං

“හුදෙක් රජ සැප පිණිස නොව මෙය”
එළ ටෝක් එක තාම වැඩ බං!
තෑන්ක්ස් අම්මප හිටිය නං හෙම
දානවා උඹෙ කටේ මසුරං

සොහොං මදිවට ගරු නම්බු තව
උඹත් ඇත්තට පොරක් මඤ්ඤං
දැම්මා ඩෝසර් ගෙටත් කෙරුවා
කතා කරනා එකත් තහනං

ඒ හුකාරිස් බැරිය – මං සුවාරිස් හරිය…?

වගේ නෑ ඒ සීසන්
අමාරුයි දැං සෙල්ලං
තියෙනවා ජාතියක් හිමිකං
මානවද මොනවදෝ මන්දා
මටත් හරියට මතක නෑ බං
(කොලු වයසෙ කීවත් මොකාටද
තියං ඉන්නට මතක පුළුවං?)

උංගෙ කට පුක වැහෙන ගේමක්
උඹ බුලට් එක ගහමු ඒනං

වරෙන් හංදියට යූ එන්
එක්කගෙන අර රහතුන්
“එක හමාරේ තියරි එක”
බස්සලා නඩු බලවලා ගමු බං………

කව්දෝ පිස්සු පොරක් දුටුගැමුණුට යැවූ ඊ මේලයක් හැම එකම ටැප් කරන උගේ මලයා විසින් අහුලාගෙන තිබියදී මෙසේ අපටත් ලීක් විය.

– රුවන් නෙලූ

18/12/2013